من أنا

صورتي
متحاولش تعرفنى ... أنا عارف نفسى ...لكن إنته متعرفنيش ولا هتقدر تعرفنى !!!!

الاثنين، 23 نوفمبر 2009

صراع الكرامة والقومية العربية


صباح التيت
أنا خلاص قررت أخرج عن الصمت عشان على رأى المثل خلاص (( زهقت وطهقت وكفرت ))
كل العك اللى بيحصلنا اليومين دول بسبب ماتش مصر والجزائر
مش فاهم إيه المشكلة فى الماتش حتى الآن
هيطلع شاب سيكى ميكى من بتوع الوطنى اللى كانوا فى الماتش يقولى كانوا بيجروا ورانا بالسنج والمطاوى
أقوله طيب يا أمور هوا إنته أول مرة تحضر ماتشات
يعنى عمر جنابك ما روحت ماتش للأهلى والزمالك مثلا ؟؟؟
وشفت جمهور الدرجة التالتة بيبقى عامل إزاى ؟؟؟
أكيد طبيعى جمهور الدرج التالتة بيكون ناس غلابه متعصبين وبيعشقوا الكورة وعايزين فريقهم يكسب بأى شكل
إن شاء الله لو هينزلوا يزقوه عشان يكسب
فالطبيعى يا كابتن يا أمور إنك مكانش المفروض إنك تروح المباراة دى نهائى
لأنها مش للشباب الأمور الحليوة اللى زيك
هتقولى طيب هما باعتين الجمهور دا فى طيارات C130 عسكرية عشان خاطر يبهدلونا
هقولك حقهم يا نجم
لسبب بسيط أوى غنهم وهما هنا فى مصر إتشمطوا على حق ربنا
إتزبطوا بالمعنى الصحيح
هتقولى أبيدا ومش أبدا هقولك كداب فى أصل وشك وشوف تقارير الداخلية ووزارة الصحة عن الجرحى واللى إتضرب بسكينه واللى عربيته إتكسرت
وكمان الإعلام بتاعهم إستغل الفرصة وزود حماس الجماهير عالفاضى
زى بالظبط ما الإعلام بتاعنا بيعمل دلوقتى اللى عايز ضرب الجزمة
هتقولى طيب هما طلعوا أحمد حسن وشحاته والناس الحلوة اللى فى المنتخب فى صور فنانات وصور مسخرة متليقش بلعيبه محترمة
هقولك أولا اللى عمل كدا دى صحافة صفرا
وبعدين إنته مش عارف الصحافة الصفرا دى هى اللى قالت من فترة على نور الشريف الفنان المحترم شاذ
يعنى ملكش حجه ولا ليك أساسا إنك تنطق
مش تقعد بقى تقولى مقاطعه ويطلع السيد علاء مبارك كل شوية بمداخلة فى برنامج شكل
أنا مش عارف أساسا ليه بيتقال عليه السيد
المحامى فى بلدنا والمحاسب بنقوله يا أستاذ والطبيب بنقوله يا دكتور والمهندس يا هندسة
غير كدا مفيش غير الأسطوات
يبقى الأسطى علاء طالع يقول إن السفير الجزائرى لو عنده دم يمشى
أنا مش فاهم إنته مالك من الأساس
إنته محسسنى إنها عزبة أبوك وإنك عمال تطرد وتهزق بمزاجك
وعمال يقول أنا مش عايز أتط تحت طايفة أبناء الرؤساء
مش فاهم أنا إيه طايفة أبناء الرؤساء يعنى نعملكم إيه ؟؟
كلنا أولاد تسعه يا أسطى ولا هوا إنتم ولاد ناس وإحنا اللى ولاد تيت
وكمان إنته بتقول عالسفير الجزائرى كلام ميطلعش من بتاع كشرى
قال إيه (( إيه التلاحة والتلامة دى ليه مش يعتذر ))
طبعا مفيش حاجة يعتذروا عليها
الناس راحت تشجع منتخبها ودول جمهور درجة تالتة وكان لازم يصدر منهم كدا

ولا جنابك مبتشوفش ماتشات الأهلى والزمالك ؟؟؟
إذا كان الناس عايزين يعملوا مقاطعة مع الجزائر ويقطعوا العلاقات
فأنا بناشد كل شاب مصرى أهلاوى أو زملكاوى
إن الأهلاوية يتجمعوا فى العتبه والزملكاوية فى التحرير ونروح نشوف مين اللى هيضرب أكتر
بما إن خلاص الأخ هيضرب أخوه
والعروبة إتنست والأخوة إتنست
والدين كمان إتنسى
يبقى نقطع فى بعض بقى

ليه تخش تعمل فتنه يعنى أنا مش فاهم
وكمان البرامج الحوارية ومنها عمرو أديب طالعين يتنططوا عالهوا ويشتموا فى الجزائر
ليه كانت ضرتكم ولا مرات أبوكم ولا هى أوامر بتنزل لكم وبتنفذوها وخلاص
وكمان أنتم يمن لا مؤاخذة عشان تعبروا عن الشعب المصرى ؟؟؟
بعضكم أحقر من أن ينطق إسم مصر
وواحد تانى يغلط فى الجزائر ويقول بلد المليون لقيط
ليه يا روح مامتك إنته تعرف أساسا إيه فى التاريخ عشان تتكلم ولا تنطق من الأساس ؟؟؟
وبعدين ليه تهين شعب بالكامل وتاريخه وتقول بلد المليون لقيط
وواحد تانى بيقول كلمة سافلة عن الستات فى الجزائر وبيشتم بقباحة والباقيين فى القعدة بيضحكوا
فعلا بقيتوا كبارية أونلاين وحاجة تحرق الدم
يعنى هما وقعوا فى الإستعمار نقوم إحنا نذلهم بقى بكدا ؟؟؟
ما إحنا الفرنسيين دخلوا المنصورة وبهدلوا الدنيا هناك
والإنجليز ياما بوظوا وبهدلوا فى شرف المصريين
فعلا اللى بتعملوه قذارة وغباوة وقباحة
مش طالبة حرقة دم ولا غباوة
لأنى بتشائم من الغباوة

والأسطى الكبير علاء باشا بيقول أنا مش بغطى على حد ولا بتكلم بالنيابة عن جمال
أنا مواطن ومسلم وبتكلم براحتى
ياعم روح إلعب بعيد
يعنى إنته طالع تعمل دعاية لجمال أخوك أو تلمع فى شخصيتك عشان خسرتلك كام مليون
أو الحاشية بتاعت جنابك بتاعت الوطنى إتظبطت فى السودان يبقى لازم تاخد لهم حقهم وتطلع تشتم فى كل حته وتهزق فى الإعلاميين عشان يقولوا إنك جامد وبتاخد لهم حقهم ويفضلوا يبوسوا فى الأيادى ؟؟؟

وبعدين ننتقل بقى إلى لعيبة المنتخب
ونقولهم بالفم المليان أيووووووووووون ظبطوكوا واحد صفر
بس مش معنى كدا إنكم مش لعبتم
أو إن أداءكم كان زبالة لا قدر الله إحنا بنشكركم
لكن مش كل شوية نطلع كابتن الفريق فى برنامج ويقعد يتدخل فى أمور سياسية وهوا أساسا لا بيفهم فيها ولا ليه فيها
وهما كلهم ملهمش غير فى الكورة وبس
ويطلع الأمور زيدان بتصريحات ويقول إن واحد فيهم شتم مامته
وواحد تانى هيطلع يقول الواد زقنى وأنا بلعب يا أستاذ
مش فاهم انا فى إيه
إنتوا أول مرة تنزلوا ماتش ولا بتستهبلوا ولا بتولعوها ولا إيه ؟؟؟
على رأى المثل (( اللى يلاقى دلع وميتدلعش ..تحرم عليه الجنة ))

واللى حارق دمى أكتر الفيس بوك ومواقع المدونات اللى بتطلب المقاطعة
واللى عاملين تغطية حاطين علم الجزائر عليه جزمة
مش فاهم يعنى الغرض إيه ؟
عايزين تولعوها أكتر ولا نسب التيت للجزائر ونقولهم يحرق تيت أبوكم وهوا تيت واحد لينا وليهم وأنتم عارفين
وكمان زى ما أنا مسمحش حد يعمل كدا فى علم مصر مسمحش حد يعمل كدا فى علم أى بلد تانى حتى لو كانت الجزائر اللى جمهورها بهدل جمهور الوطنى

والله أنا حاليا مش جاى على بالى غير الرئيس جمال عبد الناصر
لو كان حصل الموقف دا فى عهده أو فى أثناء حكمه
والله كل اللى أتوقعه إنه كان هيطلع مطواه أو سكينه من جيبه
وينزل الملعب ويقطع الكورة ميت حته
ويدى الماتش للجزائر على طبق من دهب
لأننا ببساطة أولا وأخيرا أخوات
والأخوة فى الدين والعروبة والدم أقوى من أى شىء

خالص تحياتى وإحترامى للشعب الجزائرى فهوا لم يقم بشىء مما حدث فقط كان يشاهد المباراة مثلما فعلنا
خالص أسفى لكم
فلم أجد رموزا للكرامة والقومية العربية لأضعها كصورة للمقال سوى أنور السادات وجمال عبد الناصر
شاب فقرى

هناك 15 تعليقًا:

الشعب لابد له من حكومه تشكمه يقول...

ايه المدونه دى كنت خبيها فين:)

والله ياكريم الموضوع باه سخيف وممل ورخم وغلس وخلاص هيخلوا شعرى يطقطق ابيض من الغيظ..
اصلا اللى راحوا دول مش رجااااااااله اه مش رجاله ,راجل ايه اللى لما يتحدف طوبه فى ازاز جمبه يطلع كل شويه يعيط وينهنه دنا والله معمل كده,ايه الخيبه دى.

وبعدين الماتش الاخير للاهلى والاسماعيلى تصدق بالله حصل فيه اكتر من اللى حصل ده والاتوبيسات اتكسرت وضربوا ب بعض بالحزام وقطعوا بعض بمعنى قطعوا بعض,
دول باه خنافس وفرافير زمبنا احنا ايه فى القرف ده.

بس اقولك حاجه انا مقتنعه جدااا ان فى حاجه غير الماتش لان علاء قال فى البيت بيتك:

الجزائر بقالها سنه بتتطاول على مصر واحنا ساكتين!!!!!!!!!!!!!!!!!!

معنى كده ان فى حاجه بين الدولتين واتلككوا فى الماتش.
كمان مش عاجبنى موضوع المقاطع والكلام الفاضى ده.
احنا عندنا ادراه بطيئه وخايبه واتحاد كوره فاشل مش من حقك انك تلوم التانى اللى عنده ادراه سريعه وبتعرف تتصرف..
جتهم القرف قاعدين فى التى فى يقرفوا فينا وبره بيقولوا علينا احنا الوحشين متروحوا تعملوا حاجه وقدموا ادله بدل التسخين والشتيمه والقذاره اللى بنسمعها.

تصدق انا قلت مش عاوزه اتكلم فى الموضوع ده تانى بس كل شويه حاجه تستفزنى لدرجة انى بفكر اروح امسح البوست اللى نزلته وارجع اتكلم تانى بس ماسكه نفسى:(

صحيح عامل ايه انهاردا؟

شاب فقرى يقول...

كنت شايلها على جمب من الماضى العتيق

غيرت اسمها بس خليتها دولة فقرية بدل ما كانت حرة مستقلة بس

ما هى حاجة طبيعية من جمهور الدرجة التالتة

ليه بقى يقولوا الجزائر وبتاع ويشتموا ويغلطوا ويحرقوا فى دمنا كل شوية بالبلاوى دى ؟؟؟؟

وبعدين بتتطاول بقالها سنة
وليكن

هل بق نستغل ماتش كورة كذريعة ؟؟؟؟

ولا نهمد ونتناقش براحة وبلاش شغل العيال دا والمكالمات والحركات والاشتغالات

حاجة تغيظ وربنا

وحسبى الله ونعم الوكيل فى اللى كان السبب

أنا الحمد لله تمام :)

مساءك ورد :)

شاب فقرى

مجرد حلم صغنتوت يقول...

بأمانة انا يوم الماتش مكنتش طايقة الجزاير بمعنى الكلمة لأن طول الليل قاعدة بتفرج على برنامج على النيل سبورت بيذيع الاحداث اللي بتحصل في السودان ويعمل لقاءات مع الناس اللي جت من هناك والناس اللي كانت مش عارفة ترجع من هناك اساسا
كان الموضوع محسسني اننا كنا بنحارب في دولة معادية والعدو طلع علينا وبيحاول يخلص على كل اللي كانو هناك
تاني يوم لما بدأت اسمع الرأي التاني واعرف الجرايد الجزائرية كتبت ايه على الماتش الاولاني واللي حصل بعديه وان المشجعين الجزائريين اللي كانو في مصر اتضربو وفي ناس فيهم ماتت وفي واحدة حامل أجهضت وواحدة اتخطفت باين... حاجات لبخ كده... بس بدأت اعذرهم جدا
تخيلو لو الوضع معكوس.. احنا رايحين نلعب في الجزاير والمشجعين بتوعنا مسافرين مع الفريق وبعد الماتش وبعد ما خسرنا هناك نسمع ان المشجعين 10 منهم ماتو وناس تانية اصيبت وحاجات كتير كده وفيه ماتش تاني لسه.. اعتقد لو شعبنا مكانهم كنا هنعمل اكتر من كده
ثم اصلا الروايات اللي اتحكت على اللي حصل هناك كانت مختلفة ومش شبه بعض كلها
حتى لو كان فيه قلة منهم زادو عن الحد فده مش معناه اننا نهين شعب كامل زي ما وقفنا معاه قبل كده هو كمان وقف معانا كتير اوي
اكتر حاجة ضايقتني ان اسرائيل بتطلب تتدخل بالوساطة لحل الخلاف بين مصر والجزاير
فعلا يا فرحتهم فينا

شاب فقرى يقول...

مجرد حلم صغنتوت

انا بتكلم فى النقط دى

انهم فعلا معذورين

يعنى مش لازم نبقى مبنفكرش ومنببصش من وجهة نظرهم

لازم نشوف اتقالهم ايه وايه اللى حصل ما بينا

ربنا يستر عاللى جاى

شاب فقرى

جارة القمر يقول...

ازززززززززززززيك انا جيييييييت

شوف بقى انا بجد مش طايقة نفسى من موضوع الماتش دا و لسه و الله كنت بتناقش فى الموضوع دا مع زمايلى و كنت خلاص على اخرى

يا جدعااااااااان هو اشمعنى متشطرين اوى كدا على الجزاير عشان ضربونا بالسكاكين و الناس الحمد لله لسه عايشين زى القرود اهم اشمعنى اسرائيل لما موتت مننا على الحدود ضباط ماحدش اتكلم ولا سمعنا حس حد ولا كلمة الكرامة المصرية دى جت سيرتها ولا هى كلمة بتظهر بس لما تكون الخناقة مع ناس نقدر نشد حيلنا عليهم

اشمعنا ماقولناش على جمهور الكورة عندنا همج و ولاد ستين فى سبعين لما كانوا بيكسروا الدنيا و ناس تروح المستشفيات

للاسف بجد انى اتهمت فى النهاية انى معنديش كرامة عشان بقول الكلام دا و انى مش بحب بلدى حاجه بجد تغيظ و تفرس

سورى يعنى موقفنا دا بيفكرنى بمثل "اللى مقدرش على الحمار يتشطر على البردعة" مع الاعتذار طبعا لكن مش لاقيه مثل غيره واضح و صريح

خواطر شابة يقول...

انا لن اضيف شيئا لما قلته فقط سأرفع لك القبعة وسأتأكد انه مهما بدت مظلمة هناك دائما طاقة نور ثمثلت بالنسبة لي في تدوينتك وقبلها الشعب لابد له من حكومة وتحكمه وجبهة التهييس الشعبية وأحمد الصباغ وأسماء اخرى وفي مداخلة عقلاء في التلفزيون امثال الشاعر جمال بخيت والاعلامي حافظ الميرازي وغيرهم ايضا ممن لم تحضرني اسماؤهم الان انتم كنتم طاقة النور التي تؤكد ان الخير لاينقطع في هذه الامة رغم كيد الكائدين
انا فقط ارفع يداي الى الله وابتهل ان يرينا أياته سبحانه في كل من أوقد نار هذه الفتنة انه على كل شئ قدير
تحياتي لقلمك ولفكرك

شاب فقرى يقول...

جارة القمر
الحمد لله بخير

نورتى المدونة :)

اللى مقدرش عالحمار فعلا بيتشطر عالبردعة

ودى المشكلة كلها

شاب فقرى

شاب فقرى يقول...

خواطر شابة

يارب يزيح الفتنة دى عننا يارب

شاب فقرى

الفراغ يقول...

برافو عليك
تحليل ممتاز لما يحدث
طيب هما عملوا ايه لما الرسول صلى الله عليه وسلم قالوا عليه مالا يقال

والله حاجه تكسف
ماشفناش واحد طلع عيط زى ماعمل فى الكوره
وقال الحقوا هاتوا حق نبيى ورسولى

لا حول ولا قوة الا بالله

سلمى يقول...

فعلا حضرتك عندق حق فى كلامك
مش ذنوبكم سلط عليكم
تحياتى

Cute Kitty **sookra يقول...

كريم انا بجد تعبانه
موش هاقدر اقول حاجه

غير معرف يقول...

كل ده وموش بتتكلم

برافو عليك .... جبت الخلاصه

مدونه حلوه اوي .... اسمحلي اضيفها عندي

تحياتي

Somaya Kamal El Din يقول...

ايه الحلاوة دى

البوست جااااااامد اووووى
و زى الفل

~ISLAM~ يقول...

طيب سؤال بسيط
هتفضل انت الكبير لحد امتى ؟
هتسامح وتقول اخوات وعروبه هتضرب تانى
معلش انا حاسس انك كنت وقت الماتش فى كوريا مثلا
دول جيبنلك مساجين قصاد مشجعين عاديين
اينعم مش هو ده الجمهور بتاعنا دول اللى معاهم فلوس بس ولو برده هما دول يعنى مش مصريين
وبعدين خلاص هو ماتش الكوره بقى للبلطجيه مينفعش اخد مراتى واولادى واتفرج على ماتش زيى زى اى واحد رايح يستمتع بالتشجيع وبفريقه
دول مكانوش جايين لماتش كوره
عامة انا مش هحكى فى كلام اتقال كتير
بس متهيألى كتر التسامح بيأخد الناس عليك ومش دايما السكوت من دهب
تحياتى ليك

شاب مفقوع يقول...

هي المشكلة ان اللي راحوا كانوا فرافير

انت كاتب كلام كتير محملنا احنا الغلط

مش احنا الغلط والله